Астанада «Amazon» түнгі клубы төңірегінде дау-дамай өршіп тұр. Қыркүйектің 7-сіне қараған түні аталған клубта 19 жастағы Азат есімді жігіт қаза тапты, деп жазады Alash.KZ.
Марқұмның туыстарының айтуынша, оған бес жас жігіт шабуыл жасаған. Солардың бірі пышақпен жүрек тұсына екі, аяғына екі рет соққы жасап, өлімге әкеп соқтырған. Оқиға орнында күзетшілер мен әкімшілік қызметкерлері болғанына қарамастан, ешкім көмек көрсетпеген.
Қайғылы жағдайдан кейін клубтың Instagram парақшасы өшірілді — мекеме желіде теріс пікірлердің астында қалды. Әлеуметтік желілерде "ЗаАзата" хэштегі кең тарап, қолданушылар әділдік талап етуде.
Марқұмның отбасы кінәлілердің жазалануын және клуб басшылығының әрекетсіздігі үшін жауапқа тартылуын талап етеді. Жақындарының басты талабы — «Amazon» клубын жабу. Олар осындай жағдай енді қайталанбасын дейді.
